पोखरा एभेन्जर्सलाई ७ विकेटले हराउदै कर्णाली याक्स तेस्रो जित निकाल्न सफल
कर्णाली याक्सले नेपाल प्रिमियर लिग (एनपीएल) मा पोखरा एभेन्जर्सलाई ७ विकेटले पराजित गर्दै शानदार जित दर्ता गरेको छ। बलिङतर्फ विलियम बोसिस्टोको प्रदर्शनले पोखरालाई मात्र १०३ रनमा समेट्न सफल भूमिका खेल्यो। बोसिस्टोले ४ ओभरमा २८ रन दिएर ६ विकेट लिए, जसले पोखराको ब्याटिङलाई धराशायी बनायो। पोखराका दिनेश खरेल (१९ बलमा २६ रन) र आन्द्रिस गोस (१२ बलमा २५ रन) ले राम्रो सुरुवात गरे पनि मध्यक्रमका ब्याटरहरू लगातार विकेट गुमाउँदै सस्तोमा पवेलियन फर्किएका थिए। कप्तान कुशल भुर्तेलले १० रन जोड्दा र रेमन रिफरले २० रन बनाए पनि टिमले १६.३ ओभरमै सबै विकेट गुमाएको थियो।
१०४ रनको सामान्य लक्ष्य पछ्याउँदै कर्णालीले १५ ओभरमा मात्र ३ विकेटको क्षतिमा लक्ष्य पूरा गरेको थियो। देव खनाल शून्यमा आउट भए पनि चाडविक वाल्टनले ३४ बलमा ४२ रनको महत्वपूर्ण खेल खेले। गुल्सन झाले ३७ बलमा ४९ रन बनाएर टिमलाई सहज जिततर्फ डोर्याए। बलिङतर्फ पोखराका लागि बिपिन खत्री, सागर ढकाल र कुशल भुर्तेलले १-१ विकेट लिए पनि उनीहरूले कर्णालीको ब्याटिङलाई दबाबमा राख्न सकेनन्।
यो जितसँगै कर्णाली याक्सले लिगमा आफ्नो स्थिति बलियो बनाएको छ।
