नेपाल प्रिमियर लिग क्यान आफैले आयोजना गर्ने
नेपाल प्रिमियर लिग (एनपीएल) टी-ट्वान्टी प्रतियोगिताको दोस्रो संस्करण नेपाल क्रिकेट संघ (क्यान) ले आफैं आयोजना गर्ने तयारी गरेको छ।
मंगलबार बसेको क्यानको कार्यसमिति बैठकले प्रतियोगिता सन् २०२४ को मार्च/अप्रिलमा आयोजना गर्ने निर्णय गर्दै तयारी अघि बढाउने निर्णय गरेको छ। यसअघि, प्रतियोगिताको पहिलो संस्करण भारतीय कम्पनी सेभेन थ्री स्पोर्ट्सले आयोजना गरेको थियो, तर विभिन्न विवादका कारण क्यानले उक्त कम्पनीसँगको सम्झौता रद्द गरिसकेको छ।
साथै, क्यानले देशभित्र अन्य फ्रेन्चाइज लिगहरू पनि आयोजना गर्न अनुमति दिने निर्णय गरेको छ, तर ती प्रतियोगिता विदेशी खेलाडीहरू विना घरेलु लिगको रूपमा सञ्चालन गरिनुपर्ने बताएको छ।
यस्तै, एभरेस्ट प्रिमियर लिग (ईपीएल) आयोजनासम्बन्धी प्रस्तावबारे छलफल गर्दै क्यानले एनपीएल सम्पन्न भएपछि आगामी बोर्ड बैठकमा थप निर्णय गर्ने सहमति गरेको छ।
